పెళ్లికి ఒప్పుకోలేదని మహిళపై దాడి.. నిందితుడికి ఇప్పటికే నాలుగు వివాహాలు
తనతో పెళ్లికి అంగీకరించలేదన్న ఆక్రోశంతో మహిళపై ఓ కామాంధుడు కత్తితో దాడికి పాల్పడిన ఘటన జిల్లా పత్తికొండలో గురువారం కలకలం రేపింది. నిందితుడికి ఇప్పటికే నాలుగు పెళ్లిళ్లు కాగా.. ఐదో వివాహం చేసుకునేందుకు భర్తతో విడిపోయి తల్లిదండ్రులో కలిసి ఉంటున్న మహిళను వేధించసాగాడు. అతడి ప్రతిపాదనను తిరస్కరించడంతో ప్రాణాలు తీసేందుకు ఒడిగట్టాడు. కుటుంబసభ్యులు సకాలంలో ఆస్పత్రికి తరలించి చికిత్స అందించడంతో బాధితురాలు ప్రాణాలతో బయటపడింది. పట్టణంలోని ఆంజనేయనగర్‌కు చెందిన జయమ్మకు ఇద్దరు కుమార్తెలు, ఓ కొడుకు ఉన్నాడు. భర్త చనిపోవడంతో ఆమె పిల్లలను పెంచి పెద్దచేసి ఇద్దరు కూతుళ్లకు వివాహాలు జరిపించింది. పెద్ద కుమార్తె వనతి భర్తతో విభేదాల కారణంగా పుట్టింట్లోనే ఉంటోంది. రెండేళ్ల క్రితం ఉపాధి నిమిత్తం బెంగళూరులోని మేనత్త ఉమ వద్దకు వెళ్లగా ఆమె రెండో భర్త రంగనాగరాజు వనితపై కన్నేశాడు. తన కోరిక తీర్చాలని వేధించడంతో పాటు పెళ్లి చేసుకోవాలని వేధించసాగాడు. రంగనాగరాజుకు అప్పటికే మూడు పెళ్లిళ్లు కాగా.. ఉమను నాలుగో పెళ్లి చేసుకున్నాడు. అతడి వేధింపులు తట్టుకోలేక వనిత తల్లి దగ్గరకు తిరిగొచ్చేసింది. వనితపై మనసు చంపుకోలేకపోక నాగరాజు కూడా పత్తికొండకు మకాం మార్చేసి ఆమె ఇంటికి సమీపంలోనే ఇల్లు అద్దెకు తీసుకుని ఉన్నాడు. కుటుంబ పరిస్థితి అంతంతమాత్రమే కావడంతో వనిత పత్తికొండలోని ఓ బట్టల షాపులో సేల్స్‌గర్ల్‌గా పనికి కుదిరింది. గురువారం సాయంత్రం షాపు నుంచి ఇంటికి వెళ్తున్న వనితను నాగరాజు అడ్డగించాడు. తనను పెళ్లి చేసుకోవాలని వేధించగా ఆమె తిరస్కరించి ఇంటికి వెళ్లేందుకు పరుగు తీసింది. ఆమెను వెంబడించిన నిందితుడు కొడవలితో తలపై నరికాడు. గాయంతో బాధపడుతూనే ఇంటికి వెళ్లి కుప్పకూలిపోయింది. దీంతో కుటుంబసభ్యులు, స్థానికులు ఆమెను పత్తికొండ ప్రభుత్వాసుపత్రికి తరలించారు. ప్రథమచికిత్స అనంతరం బాధితురాలిని కర్నూలు ప్రభుత్వాసుపత్రికి తరలించారు. ఈ దాడిపై సమాచారం అందుకున్న పోలీసులు బాధితురాలిని పరామర్శించి వివరాలు సేకరించి దర్యాప్తు చేపట్టారు.
By July 19, 2019 at 11:35AM
No comments