రెండు రోజుల్లో 94 మంది డీఎస్పీల బదిలీ.. టీడీపీ ఎమ్మెల్యే సోదరుడికి షాక్!

ఏపీలో పోలీస్ అధికారుల బదిలీల పర్వం కొనసాగుతోంది. రెండు రోజుల వ్యవధిలోనే మొత్తం 94 మంది డీఎస్పీలను బదిలీచేయడం విశేషం. జులై 15న 45 మంది డీఎస్పీలను బదిలీచేసిన విషయం తెలిసిందే. తాజాగా 45 మంది డీఎస్పీలను బదిలీ చేస్తూ గౌతమ్‌ సవాంగ్‌ గురువారం ఉత్తర్వులు జారీ చేశారు. వీరిలో కొందరికి వేరే చోట పోస్టింగ్‌లు ఇవ్వగా, కొందర్ని హెడ్ క్వార్టర్స్‌కు రిపోర్ట్ చేయాలని ఆదేశించారు. బదిలీ చేసినవారిలో కొందరికి రాయలసీమ జిల్లాలు, ఇంకొందరికి మిగతా జిల్లాల్లో పోస్టింగ్‌లు దక్కాయి. టీడీపీ ఎమ్మెల్యె అచ్చెన్నాయుడు సోదరుడు ప్రభాకర్ సహా పలువురు డీఎస్పీలని మళ్లీ హెడ్ క్వార్టర్ కి బదిలీ చేయడం విశేషం. ఒంగోలు, గురజాల, కాశీబుగ్గ, పాలకొండ, అమలాపురం, విజయవాడ దక్షిణ, చింతూరు, కాకినాడ, పెద్దాపురం, రామచంద్రపురం, ఏలూరు, కొవ్వూరు, జంగారెడ్డిగూడెం, రాజమండ్రి (నార్త్, ఈస్ట్, సెంట్రల్, సౌత్), గుంతకల్లు, చిత్తూరు, పలమనేరు, తిరుపతి తూర్పు, ఆదోని, నెల్లూరు గ్రామీణ, విజయనగరం, కదిరి, విశాఖపట్నం సిటీ పరిధిలోని ద్వారక, విశాఖ (తూర్పు, ఉత్తర, దక్షిణ, పశ్చిమ), తాడిపత్రి, అనకాపల్లి సబ్‌డివిజన్లలో ప్రస్తుతం డీఎస్పీల స్థానంలో వేరేవారిని నియమించారు. అదేవిధంగా పలు జిల్లాల్లో స్పెషల్‌ బ్రాంచి డీస్పీలుగా కొందరికి బాధ్యతలు అప్పగించారు. కొందరిని పోలీసు ప్రధాన కార్యాలయంలో రిపోర్టు చేయాలని ఆదేశించారు. మంగళవారం 49 మంది డీఎస్పీలను బదిలీ చేసి ఏపీ డీజీపీ, వీరిలో 38 మందిని సబ్‌ డివిజన్లలో డీఎస్పీలుగా నియమించగా, వివిధ విభాగాల్లో పనిచేస్తున్న మరో పది మందిని నిఘా విభాగానికి బదిలీ చేశారు. ఒకరికి సీసీఎస్‌లో డీఎస్పీగా బాధ్యతలు అప్పగించిన డీజీపీ, సబ్‌ డివిజన్లలో డీఎస్పీలుగా పనిచేస్తున్న వారిలో నలుగురికే అక్కడ బాధ్యతలు అప్పగించారు. మిగతా 23 మందిని హెడ్ క్యార్టర్స్‌కు రిపోర్టు చేశారు. ఉత్తరాంధ్ర, గోదావరి జిల్లాలు మినహా మిగతా ప్రాంతాల సబ్‌ డివిజన్లకు సంబంధించి ఈ బదిలీలు జరిగాయి. జూన్ 27న తొలిసారిగా 37 మంది డీఎస్పీలను బదిలీ చేసి, వారిని హెడ్ క్వార్టర్స్‌కు అటాచ్ చేశారు. ప్రస్తుతం వారి స్థానాల్లో వేరేవారిని నియమించారు. పోలీస్ డిపార్ట్‌మెంట్ చరిత్రలో ఇంత పెద్దఎత్తున బదిలీలు చేపట్టిన దాఖలాలు లేవని అంటున్నారు. అలాగే బదిలీచేసిన వారిని హెడ్‌క్యార్టర్స్‌కు అటాచ్ చేయడం ఇదే తొలిసారని అంటున్నారు. ఒకవేళ ఏదైనా కారణాలతో ఇలా అధికారులను పెద్ద సంఖ్యలో హెడ్‌క్వార్టర్‌కు బదిలీ చేసినా.. వారికి వారం పది రోజుల్లోగా పోస్టింగులు ఇచ్చేవారు. కానీ, వీరికి ఇంతవరకూ పోస్టింగ్ ఇవ్వకపోవడం గమనార్హం. ఏపీ పోలీస్ విభాగంలో కులాల కురుక్షేత్రం సాగుతోందనే వాదన వినిపిస్తోంది. టీడీపీ హయాంలో కమ్మ, నేడు ప్రభుత్వంలో రెడ్డి పొలిటికల్ గేమ్‌లో నలిగిపోతున్నామని కొంతమంది డీఎస్పీలు ఆవేదన చెందుతున్నారు. ఐపీఎస్‌ల మాదిరిగా తమకూ కేడర్లు ఉండి ఉంటే వేరే రాష్ట్రాలకు వెళ్లిపోతామని వాపోతున్నారు. ఏపీ పోలీస్ డిపార్ట్‌మెంట్‌లో ఈ అంశం ఇప్పుడు పెద్ద రచ్చగా మారింది.

By July 19, 2019 at 10:38AM

Read More https://telugu.samayam.com/latest-news/state-news/andhra-pradesh-dgp-gowtham-sawang-passed-on-order-of-45-dsps-transfer/articleshow/70287945.cms