ఇస్రో అనూహ్య నిర్ణయం.. ప్రయోగానికి గంట ముందే చంద్రయాన్-2 నిలిపివేత!
భారత అంతరిక్ష పరిశోధన సంస్థ(ఇస్రో) ప్రతిష్ఠాత్మకంగా చేపట్టిన ‘చంద్రయాన్-2’ఉపగ్రహ ప్రయోగం అనూహ్యంగా నిలిచిపోయింది. ఉపగ్రహాన్ని చంద్రునిపైకి తీసుకెళ్లే జీఎస్ఎల్వీ మార్క్3 రాకెట్లో సాంకేతిక సమస్యలు తలెత్తడంతో ఈ ప్రయోగాన్ని నిలిపివేసినట్లు తెలిపింది. ప్రయోగానికి సరిగ్గా 56 నిమిషాల 24 సెకన్ల ముందు కౌంట్డౌన్ నిలిపివేశారు. మళ్లీ ఈ ప్రయోగాన్ని ఎప్పుడు నిర్వహించేది తర్వాత ప్రకటిస్తామని ఇస్రో అధికారులు చెప్పారు. అన్నీ సక్రమంగా జరిగుంటే సోమవారం తెల్లవారుజామున 2 గంటల 51 నిమిషాలకు జీఎస్ఎల్వీ మార్క్3-ఎం1 రాకెట్ ద్వారా చంద్రయాన్-2ను నింగిలోకి పంపేవారు. ప్రయోగానికి ముందు నిర్వహించే 20 గంటల కౌంట్డౌన్ ఆదివారం ఉదయం 6.51 గంటలకు ప్రారంభమైంది. శ్రీ పొట్టి శ్రీరాములు నెల్లూరు జిల్లాలోని సతీశ్ ధవన్ స్పేస్సెంటర్ షార్లోని రెండో ప్రయోగ వేదిక నుంచి ప్రయోగించేందుకు అన్ని ఏర్పాట్లు చేశారు. ప్రయోగానికి ముందు నిర్వహించే రాకెట్ సన్నద్ధత సమావేశాన్ని షార్లోని బ్రహ్మ ప్రకాష్ హాలులో శనివారం సాయంత్రం వరకు నిర్వహించారు. ఇందులో రాకెట్ ప్రయోగ తేదీ, సమయం అధికారికంగా నిర్ధరించిన అనంతరం లాంచ్ ఆథరైజేషన్ బోర్డు (ల్యాబ్) సమావేశం జరిగింది. ఈ సందర్భంగా జీఎస్ఎల్వీ ప్రయోగానికి గ్రీన్ సిగ్నల్ ఇచ్చారు. అయితే, అనూహ్యంగా చంద్రయాన్-2 ప్రయోగానికి గంట ముందు వాయిదా పడటంతో దీనిని ఎప్పుడు చేపడతారన్నది ప్రస్తుతం ఆసక్తికరంగా మారింది. చంద్రయాన్-1 తర్వాత చంద్రుడిపైకి రెండో ఉపగ్రహం పంపేందుకు ఇస్రో తీవ్ర ప్రయత్నాలు చేసింది. కొన్ని ప్రతికూల పరిస్థితులు కారణంగా ప్రయోగాన్ని వాయిదా వేస్తూ వస్తోంది. చివరకు జులై 15న ఈ ప్రయోగం నిర్వహించాలనే కృతనిశ్చయంతో సర్వం సిద్ధం చేసింది. సాధారణంగా నిర్దిష్ట సమయంలోనే వ్యోమనౌకను ప్రయోగించాల్సి ఉంటుంది. ఒకవేళ అప్పుడు ప్రయోగించలేకపోతే మళ్లీ అనువైన సమయం వరకూ ఎదురు చూడాల్సిందే. ప్రస్తుత లాంచ్ విండో(సోమవారం తెల్లవారుజాము)లో ప్రయోగాన్ని పూర్తిచేసేందుకు ఇస్రో తీవ్రంగా ప్రయత్నించినా నిరాశే ఎదురైంది. మళ్లీ ఈ ప్రయోగాన్ని చేపట్టేందుకు అనువుగా ఈ నెలలో కేవలం 1 నిమిషం నిడివి ఉన్న లాంచ్ విండోలే అందుబాటులో ఉన్నాయి. సోమవారం నాటి లాంచ్ విండో నిడివి దాదాపు 10 నిమిషాలు కావడం గమనార్హం.
By July 15, 2019 at 04:23AM
No comments