బైడెన్ విజయం భారత్‌‌కు ప్రయోజమేనా? కమలా ఎంపిక వెనుక వ్యూహమిదేనా?

అమెరికా 46వ అధ్యక్షుడిగా డెమొక్రటిక్ పార్టీ నేత ఎన్నికయ్యారు. అయితే, కానీ భారత్‌తో సంబంధాలపై ఇది ఏ మేరకు ప్రభావం చూపుతుందనేది కీలకం కానుంది. ప్రస్తుత అధ్యక్షుడు డొనాల్డ్‌ ట్రంప్‌ హయాంలో ఇరు దేశాల మధ్య ద్వైపాక్షిక సంబంధాలు బలపడ్డాయి. మరి ఈ విషయంలో బైడెన్‌ వ్యవహారశైలి ఎలా ఉండబోతుందనేది చర్చనీయాంశమవుతోంది. అయితే, భారత్‌తో సంబంధాలు బైడెన్‌గానీ కొత్తేమీ కాదు. ఒబామా హాయంలో ఉపాధ్యాక్షుడిగా పనిచేసిన అనుభవం ఉంది. ప్రధాని నరేంద్రమోదీ 2016లో అమెరికాలో పర్యటించడంతో ఇద్దరికీ ఇప్పటికే పరిచయం ఉంది. డొనాల్డ్ ట్రంప్, బైడెన్ ఆలోచనలో భారీ తేడా ఉంది. మనసులో ఏమీ దాచుకోకుండా బయటకు చెప్పేయడం ట్రంప్ నైజం. బిడైన్ ఆలోచించి మాట్లాడుతారు. కానీ, చివరకు అమెరికాయే తొలి ప్రాధాన్యత అనే విధానాన్నే అవలంబిస్తారనే వాదన ఉంది. ఈ ఎన్నికల్లో జో బైడెన్ గెలుపును భారతీయులు కాంక్షించారు. దీనికి ట్రంప్‌పై ఉన్న ఆగ్రహంతో పాటు ఉపాధ్యక్ష అభ్యర్థిగా భారత సంతతి మహిళ కమలా హ్యారిస్ ఉండటమే కారణం. అయితే, కమలా ఎంపిక వెనుక పెద్ద వ్యూహమే ఉంది. ట్రంప్‌ వైఖరి పట్ల ఆఫ్రికా, ఆసియా సంతతి పౌరులు తీవ్ర ఆగ్రహంతో ఉన్నారు. ఈ విషయాన్ని గ్రహించిన బైడెన్‌.. తనకు అనుకూలంగా మార్చుకోడానికి కమలా తప్పా ఇంకో ప్రత్యామ్నాయం కనిపించలేదు. ఇక్కడే రాజకీయ చతురతను ప్రదర్శించారు. తెలివైన ఎత్తుగడతో ట్రంప్‌పై ఉన్న వ్యతిరేకతను క్యాష్ చేసుకున్నారు. భారత్‌తో అనుబంధం గతంలో మాదిరిగా కాకుండా వ్యవస్థీకృతమైంది. దాన్ని బలహీనపర్చటం అంత తేలికైన విషయం కాదు. చాలా అంశాల్లో భారత్‌ మద్దతు లేకుండా పెద్దన్న పాత్ర పోషించడం అమెరికాకు సాధ్యం కాదు. బైడెన్‌ కూడా తన ఎన్నికల ప్రచారంలో భారత అమెరికన్లకు దగ్గరయ్యారు. భారత్‌తో స్నేహసంబంధాలకు బైడెన్‌ ప్రభుత్వం పెద్దపీటే వేయాల్సిన పరిస్థితి ఉందని బైడెన్‌ సన్నిహిత వర్గాలు వ్యాఖ్యానించటం గమనార్హం. బైడెన్ విజయం భారత్‌, అక్కడ భారతీయులపై ఎటువంటి ప్రభావం చూపుతుందన్నది కీలక అంశం. ప్రధాని నరేంద్ర మోదీ... బైడెన్‌తో కలిపి... ముగ్గురు అమెరికా అధ్యక్షులతో ఒప్పందం కుదుర్చుకున్నట్లు అవుతుంది. ఎన్నికల ప్రచారంలోనూ బైడెన్ తన వైఖరిని స్పష్టం చేశారు. రెండు దేశాల సంబంధాలను మరింత పటిష్టం చేసేలా చర్యలు తీసుకుంటామని హామీ ఇచ్చారు. పౌరసత్వ సవరణ చట్టం (CAA),ఆర్టికల్ 370 రద్దును బైడెన్ వ్యతిరేకిస్తూ.. పాకిస్థాన్‌కి అనుకూలంగా మాట్లాడారు. అందువల్ల జో విషయంలో భారత్ మరీ అంత సానుకూలంగా భావించాల్సిన అవసరం లేదని రాజకీయ విశ్లేషకులు అభిప్రాయపడుతున్నారు. కానీ, భారత్‌ విషయంలో బైడెన్‌తో పాటు వైస్-ప్రెసిడెంట్ కమలా హారిస్‌ కూడా చాలా కీలకం. ఎందుకంటే... ఇప్పటికే బైడెన్‌కు వయసు పైబడటంతో తర్వాత ఎన్నికల్లో డెమొక్రటిక్ పార్టీ అధ్యక్ష అభ్యర్థిగా కమలా హ్యారిస్ ఉంటారు. కాబట్టి... చాలా అంశాల్లో ఆమె ప్రభావం ఎక్కువగా ఉంటుంది. చైనాతో అమెరికా సంబంధాలు ఎలా ఉండబోతాయనేది భారత్‌కు కీలకం. ట్రంప్‌ మాదిరిగా చైనాతో ప్రతి విషయానికి రాద్దాంతం చేయకపోవచ్చు. చైనా విషయంలో మెతక వైఖరి అవలంభించినా కష్టమే. అంతర్జాతీయంగా పెద్దన్న పాత్రను తిరిగి పోషించాలనుకుంటున్న అమెరికా కచ్చితంగా చైనాతో పోటీపడుతుంది. ఈ నేపథ్యంలో భారత్‌ సాయం అవసరం అవుతుంది. హెచ్‌-1 బి వీసాల విషయంలో హామీలిచ్చినప్పటికీ ఇప్పటికిప్పుడు మరీ అంత స్వేచ్ఛగా ఉంటారనుకోవటం అత్యాశే అవుతుంది. ఈ విషయంలో ఆయన ఎలా వ్యవహరిస్తారనేది కీలకం.

By November 08, 2020 at 12:18PM

Read More https://telugu.samayam.com/latest-news/international-news/what-joe-bidens-victory-in-the-us-elections-means-for-india-relations/articleshow/79109937.cms