పెళ్లయిన కొత్తలో భర్త ఇచ్చిన గిఫ్ట్.. పోగొట్టుకున్న 26 ఏళ్ల తర్వాత చెంతకు..!

పెళ్లయిన కొత్తలో విదేశాలకు వెళ్తూ.. భర్త ఎంతో ప్రేమగా ఇచ్చిన బహుమతిని రైళ్లో ఓ దొంగ ఎత్తుకెళ్లాడు. వెంటనే రైల్వే పోలీసులకు ఫిర్యాదు చేసిన ఆమె దానిపై ఆశలు వదిలేసుకుంది. ఫిర్యాదు చేసిన విషయాన్నే మర్చిపోయింది. కానీ మాత్రం తమ బాధ్యతను మర్చిపోలేదు. 26 ఏళ్ల తర్వాత ఆమె గోల్డ్ చైన్‌ను ఆమెకు తిరిగి ఇచ్చేశారు. దీంతో ఆమె ఆనందానికి అవధుల్లేకుండా పోయాయి. ముంబైలో జరిగిన ఈ ఘటన వివరాల్లోకి వెళ్తే.. పింకీ డికున్హా, సునీల్ కొత్త దంపతులు చర్చ్ గేట్ ప్రాంతంలో నివాసం ఉండేవారు. పెళ్లయిన కొత్తలో సునీల్ ఉద్యోగ రీత్యా దక్షిణాఫ్రికా వెళ్తూ.. తన గుర్తుగా భార్యకు గోల్డ్ చైన్‌ను బహుకరించాడు. భర్త విదేశాలకు వెళ్లడంతో.. పింకీ తన తల్లితో కలిసి నివసించేది. ఖాళీగా ఉండటం ఎందుకని మెరైన్ లైన్స్ ప్రాంతంలోని ఓ ఆఫీసులో ఉద్యోగం చేసేది. రోజూ రైల్లో ఆఫీసుకు వెళ్లి వస్తుండేది. 1994, ఫిబ్రవరి 8న ఇలాగే ఆఫీసుకు వెళ్లి వస్తుండగా.. ఓ దొంగ పింకీ మెడలోని చైన్‌ను లాగేశాడు. దీంతో ఆమె ముంబై సెంట్రల్ రైల్వే పోలీసులకు ఫిర్యాదు చేసింది. అదే ఏడాది ఏప్రిల్ 15న విచారణ ప్రారంభం కాగా.. రైల్వే పోలీసులు మహ్మద్ నిజాం నాసిర్ అనే దొంగను పట్టుకున్నారు. కానీ పింకీ ఆచూకీ ఎక్కడ ఉందనేది తెలియలేదు. దీంతో ఆమె చైన్‌ను ముంబై సెంట్రల్ జీఆర్‌పీ స్టేషన్‌‌లో ఉంచారు. 1974 నుంచి చాలా మంది వస్తువులు జీఆర్‌పీ స్టేషన్‌లోనే ఉండిపోవడంతో.. వాటిని తిరిగి యజమానులకు అప్పగించాలని పోలీసులు నిర్ణయించారు. దీంతో పింకీ ఇచ్చిన అడ్రస్‌కు మిలింద్ పాటిల్ అనే పోలీసు వెళ్లి విచారించగా.. ‘ఎంతో మంది అద్దెకు వస్తుంటారు, వెళ్తుంటారు.. ఇప్పుడు ఆమె ఎక్కడుందో తెలియద’ని ఇంటి యజమాని బదులిచ్చాడు. దీంతో ఆ ఇంట్లో అద్దెకు ఉంటున్న మిగతా వాళ్లందర్నీ పింకీ గురించి ఎంక్వైరీ చేయగా.. ఒకామె తను ఇప్పటికీ పింకీతో టచ్‌లో ఉన్నానని చెప్పింది. ఆమె దగ్గర పింకీ ప్రస్తుతం ఉంటున్న అడ్రస్ తీసుకొన్న పాటిల్.. శనివారం వెళ్లి పింకీ ఇంటికెళ్లి తలుపు తట్టాడు. మీరు అప్పుడెప్పుడో గొలుసు పోగొట్టుకున్నారు కదా.. ఇద్దామని వచ్చా అనగానే.. ముందు ఆమె నమ్మలేదు. కానీ ప్లాస్టిక్ కవర్‌లో ఉన్న చైన్‌ను చేతిలో పెట్టగానే ఆమె ఆశ్చర్యపోయింది. 1994లో ఆ చైన్ విలువ 4500, ఇప్పుడు రూ.33,500. దాని ఖరీదు మాట అటుంచి.. తన భర్త ఎంతో ప్రేమగా ఇచ్చిన బహుమతిని 26 ఏళ్ల తర్వాత తిరిగి సొంతం చేసుకున్నందుకు ఆమె ఎంతో సంతోషించింది. పోలీసాయనకు మనస్ఫూర్తిగా ధన్యవాదాలు తెలిపింది.

By August 24, 2020 at 09:08AM

Read More https://telugu.samayam.com/latest-news/india-news/mumbai-woman-gets-back-god-chain-after-26-years-thank-to-grp-police/articleshow/77712811.cms