YS Jagan: ఇలాంటి వ్యక్తులు సీఎం అయితే రాష్ట్రానికి ఏం న్యాయం జరుగుతుంది?: పవన్
ఇలాంటి వ్యక్తులు సీఎం అయితే రాష్ట్రానికి ఏం న్యాయం జరుగుతుందని..? వైఎస్ జగన్ను ఉద్దేశించి వ్యాఖ్యానించారు. ఇటీవల ఢిల్లీ వెళ్లిన జగన్.. తనపై ఉన్న సీబీఐ కేసులకు భయపడి కేంద్ర మంత్రులపై ఒత్తిడి తేలేకపోయారన్నారు. పలు కేసుల్లో నిందితుడైన వ్యక్తి ధైర్యంగా వ్యవహరించలేడని.. జగన్ ఢిల్లీ పర్యటనలోనూ ఇదే జరిగిందని జనసేనాని తెలిపారు. కేంద్ర మంత్రులతో ఇంటర్వ్యూలను సైతం జగన్ తిరస్కరించారని పవన్ ఆరోపించారు. తనపై పెండింగ్లో ఉన్న సీబీఐ కేసులకు భయపడి రాష్ట్ర ప్రాజెక్టుల విషయంలో బలంగా మాట్లాడలేకపోయారని జనసేనాని విమర్శించారు. జగన్ లాంటి వ్యక్తులు సీఎం అయితే రాష్ట్రానికి ఏం న్యాయం జరుగుతుందన్నారు. మంగళగిరిలో ప్రకాశం జిల్లా నేతలతో మాట్లాడిన సందర్భంగా పవన్ కళ్యాణ్ ఈ వ్యాఖ్యలు చేశారు. ‘‘జగన్ ప్రతిపక్షంలో ఉన్నప్పుడు రాష్ట్ర పోలీసులపై తనకు నమ్మకం లేదన్నారు. విశాఖ విమానాశ్రయంలో తనపై దాడి, తన చిన్నాన్న వివేకానంద హత్య కేసులను సీబీఐకి అప్పగించాలని డిమాండ్ చేశారు. ఇప్పుడెందుకు ఆయన సీబీఐ విచారణకు ఆదేశించడం లేద’’ని పవన్ ప్రశ్నించారు. సీఎం అయ్యాక జగన్ ఈ కేసుల విషయం మర్చిపోయారా? ఆయన మర్చిపోయారేమో కానీ నేను కాదని పవన్ వ్యాఖ్యానించారు. జగన్ అవకాశవాద రాజకీయాలు చేస్తున్నారని పవన్ కళ్యాణ్ ఆరోపించారు. వైఎస్ఆర్సీపీ ఎమ్మెల్యే శ్రీధర్ రెడ్డి ఓ జర్నలిస్టు మీద, మహిళా అధికారి మీద దాడికి దిగారని.. తూర్పుగోదావరి జిల్లాలో అధికార పార్టీకి చెందిన వ్యక్తి ఒకర్ని కత్తితో పొడిచారన్న పవన్.. జగన్ నేరాలను ప్రోత్సహిస్తే.. ఆయన పక్కన ఉన్నవారు కూడా అలాగే చేస్తారన్నారు. జగన్తో, చంద్రబాబుతో తనకు వ్యక్తిగత విబేధాలేవీ లేవన్న పవన్.. వారు తనకు ఏదైనా హాని తలపెడతారని భయపడటం లేదన్నారు. ప్రజలకు సమస్యలు ఎదురవుతుంటే చూస్తూ ఊరుకోనన్నారు. వైఎస్ఆర్సీపీ 151 సీట్లను గెలిచి భారీ విజయంతో అధికారంలోకి రావడంతో.. అప్పుడే రోడ్డెక్కాల్సిన అవసరం వస్తుందని తాను భావించలేదని పవన్ తెలిపారు. ‘‘రెండు మూడేళ్ల వరకు రోడ్డెక్కే అవసరం రాదనుకున్నాను. భారీ విజయం సాధించిన వైఎస్ఆర్సీపీ 15-20 ఏళ్లపాటు అధికారంలో కొనసాగుతుందనుకున్నా. కానీ ప్రజల్లో నమ్మకం సన్నగిల్లేల్లా వైఎస్ఆర్సీపీ నేతలు పని చేస్తున్నార’’ని పవన్ ఆరోపించారు.
By October 24, 2019 at 08:13AM
No comments