పేదలకు జగన్ సర్కారు గుడ్ న్యూస్.. ఒక్క రూపాయికే స్థలాల క్రమబద్ధీకరణ

ప్రజాసంక్షేమమే పరమావధిగా ముందుకెళ్తున్న జగన్ సర్కారు.. పట్టణాల్లో ఉంటున్న పేదలకు గుడ్ న్యూస్ చెప్పింది. పట్టణ ప్రాంతాల్లో అభ్యంతరాలేవీ లేని అక్రమ నిర్మాణాలను క్రమబద్ధీకరించేందుకు ముందుకొచ్చింది. ఇంటి స్థలం రెండు సెంట్లలోపు వరకు రూపాయికే రిజిస్ట్రేషన్‌ చేయాలని సీఎం ఆదేశించారు. స్థలం రెండు సెంట్లకు మించితే క్రమబద్ధీకరణ కోసం ఫీజు వసూలు చేయనున్నారు. అదెంత ఉండాలన్నది త్వరలోనే నిర్ణయించనున్నారు. ఉగాది నాటికి రాష్ట్రంలోని 20 లక్షల మంది పేదలకు ఇళ్ల స్థలాల పట్టాలు పంపిణీ చేస్తామని జగన్ ప్రకటించిన సంగతి తెలిసిందే. ఈ విషయమై చర్చించడం కోసం సీఎం అధ్యక్షతన గురువారం రెవెన్యూ మంత్రి పిల్లి సుభాష్‌ చంద్రబోస్, పట్టణాభివృద్ధి శాఖ మంత్రి బొత్స సత్యనారాయణ, ఆర్థిక మంత్రి బుగ్గన రాజేంద్రనాథ్, గృహ నిర్మాణ శాఖ మంత్రి రంగనాథరాజులతో ఉన్నతస్థాయి సమీక్ష సమావేశం జరిగింది. రూపాయికే ఇళ్ల స్థలాలను క్రమబద్దీకరించాలని జగన్ సర్కారు తీసుకున్న నిర్ణయంతో.. పట్టణ ప్రాంతాల్లోని పేదలకు లబ్ధి చేకూరుతుంది. నదీతీరాలు, కాల్వగట్ల వెంబడి ఉన్న ఇళ్ల కారణంగా ప్రజలకు హాని తలెత్తే అవకాశం ఉండటంతో.. స్థలాలు, ఇళ్ల కేటాయింపులో వారికి ప్రాధాన్యం ఇవ్వాలని సీఎం ఆదేశించారు. ఇళ్ల నిర్మాణానికి వీలైనంత మేర ప్రభుత్వ స్థలాలనే వాడుకోవాలని సీఎం సూచించారు. పట్టణ ప్రాంతాల్లో పేదల కోసం అపార్ట్‌మెంట్ ప్లాట్లు ఇవ్వడం కంటే అవకాశం ఉన్న చోట విడిగా ఇళ్లు కటించడమే మంచిదన్నారు. ప్లాట్ల నిర్వహణ సరిగా ఉండే అవకాశం ఉండదనే ఉద్దేశంతోనే.. ఇలా అంటున్నానని సీఎం తెలిపారు. ఇళ్ల స్థలాలు పొందే లబ్ధిదారుల జాబితాను గ్రామ, వార్డు సచివాలయాల్లో తప్పనిసరిగా ప్రదర్శించాలని జగన్ ఆదేశించారు. ఇళ్ల స్థలాల కోసం దరఖాస్తలున జనవరి వరకు స్వీకరించాలని జగన్ సూచించారు. కాగా ఇప్పటి వరకూ లబ్ధిదారుల సంఖ్య 20 లక్షలు దాటిందని అధికారులు సీఎంకు సూచించారు. గ్రామీణ ప్రాంతాల్లో ఇంటి స్థలాల పంపిణీ కోసం 19,389 ఎకరాల భూమిని గుర్తించిన అధికారులు.. మరో 8 వేల ఎకరాలు అవసరం ఉండొచ్చని తెలిపారు. పట్టణ ప్రాంతాల్లో 2559 ఎకరాలను గుర్తించగా.. మరో 11 వేల ఎకరాల భూమి అవసరమని సీఎంకు తెలిపారు.

By October 18, 2019 at 12:13PM

Read More https://telugu.samayam.com/andhra-pradesh/news/ys-jagan-govt-to-regularize-unapproved-plots-of-poor-people-for-only-one-rupee/articleshow/71644366.cms