పండగ వేళ రూపాయికే టీ షర్ట్, రూ.10కి నైటీ.. ఎగబడ్డ జనం!

పండగ రోజుల్లో పలు ఆఫర్లతో వ్యాపారులు కస్టమర్లను ఆకట్టుకుంటారు. ముఖ్యంగా వస్త్ర దుకాణాలు డిస్కౌంట్ల పేరుతో వినియోగదారుల్ని రాబట్టే ప్రయత్నం చేస్తాయి. చెన్నైలోని ఓ బట్టల షాప్ మాత్రం కేవలం రూపాయికి షర్ట్, రూ.10కి నైటీ విక్రయించింది. ఈ ఆఫర్ కేవలం ఒక్క రోజు కాదు వారం రోజులు కొనసాగించింది. పండుగ వేళ పేదలకు తక్కువ ధరకే వస్త్రాలను విక్రయించాలని చాకలిపేట టెక్స్ షోరూం యజమాని ఆనంద్ నిర్ణయించారు. దీంతో దీపావళి సందర్భంగా అక్టోబరు 19 నుంచి 26 వరకు ఆఫర్ అమ్మకాలు కొనసాగించారు. ఉదయం 10 నుంచి రాత్రి 11 గంటల వరకు రూపాయికి , రూ.10కి నైటీ విక్రయించినట్టు తెలిపారు. తొలుత 50 మందికి మాత్రమే ఈ ఆఫర్‌ అమలుచేయగా రద్దీ పెరగడంతో 200 మందికి టోకన్లు ఇచ్చి విక్రయించాడు. వీటికోసం వేకువజాము నుంచే ప్రజలు దుకాణం ముందు బారులు తీరారు. ఈ సందర్భంగా వ్యాపారి అనంద్‌ మాట్లాడుతూ.. పేద ప్రజలు కూడా ఖరీదైన వస్త్రాలు ధరించి దీపావళి జరుపుకోవాలన్న ఉద్దేశంతో ఈ ఆఫర్‌ అమలుచేసినట్టు తెలిపారు. ఉచితంగా ఇస్తే దానికి విలువ ఉండదని, అందుకే రూపాయికి షర్ట్, రూ.10కి నైటీ విక్రయించినట్లు వివరించారు. ఈ ఆఫర్ గురించి తెలిసిన జనం ఎగబడ్డారు. దీంతో షాప్ ముందు భారీగా జనం బారులు తీరడంతో పోలీసులు రంగంలోకి దిగాల్సి వచ్చింది. ఇటీవల కడపలో ఓ వస్త్ర దుకాణం కేవలం రూ.9కే చీర విక్రయిస్తున్నట్లు ప్రకటించింది. దీంతో వందల సంఖ్యలో మహిళలు బారులు తీరారు. ఉదయం ఆరు గంటల నుంచే కిలోమీటర్ల మేర వేచి ఉన్నారు. తొమ్మిది రూపాయలకు చీర.. రూపాయికే బ్యాగు ఇస్తుండడంతో పెద్ద సంఖ్యలో మహిళలు తరలివచ్చారు. చిన్నాపెద్దా తేడా లేకుండా చీరల కోసం ఎగబడ్డారు. ఎలాంటి ఇబ్బందులూ తలెత్తకుండా పోలీసు బందోబస్తు ఏర్పాటు చేశారు. మూడునెలల కింద కరీంనగర్‌లోనూ ఓ షాపింగ్ మాల్ రూ.10 చీర విక్రయించడంతో మహిళలు భారీగా తరలిరావడంతో తొక్కిసలాట చోటుచేసుకుంది.

By October 27, 2019 at 10:09AM

Read More https://telugu.samayam.com/latest-news/india-news/a-cloth-store-in-chennai-offers-shirt-for-one-rupee-and-nighty-only-ten-rupee/articleshow/71782477.cms