దురుద్దేశంతోనే ఆ కేసులు.. వాటిని కొట్టేయండి: రవిప్రకాశ్
టీవీ సంస్థలో మాజీ సీఈఓ రవిప్రకాశ్ అక్రమాలకు పాల్పడినట్టు కొత్త యాజమాన్యం ఫిర్యాదు చేయడంతో ఆయనపై పోలీసులు పలు సెక్షన్ల కింద కేసులు నమోదుచేసిన విషయం తెలిసిందే. ఈ కేసుల్లో ముందుస్తు బెయిల్ కోసం రవిప్రకాశ్ తొలుత హైకోర్టుకు తర్వాత సుప్రీంకోర్టుకు వెళ్లారు. సుప్రీం సూచనలతో మళ్లీ హైకోర్టునే ఆశ్రయించారు. ఆయన బెయిల్ పిటిషన్పై విచారణ పూర్తిచేసిన తెలంగాణ హైకోర్టు నిర్ణయాన్ని వాయిదా వేసింది. ఈ నేపథ్యంలో తనపై ఉన్న ఎఫ్ఐఆర్లను కొట్టివేయాలని కోరుతూ రవిప్రకాశ్ మరోసారి హైకోర్టులో పిటిషన్ దాఖలు చేశారు. దురుద్దేశంతో తనపై ఈ కేసులు వేశారని ఆయన పేర్కొన్నారు. సైబరాబాద్, బంజారాహిల్స్ పోలీసులు నమోదు చేసిన మూడు ఎఫ్ఐఆర్లను కొట్టివేయాలని అభ్యర్థిస్తూ వేర్వేరుగా మూడు పిటిషన్లు వేశారు. ఇందులో ప్రతివాదులుగా తెలంగాణ ప్రభుత్వంతోపాటు అలందా మీడియాను పేర్కొన్నారు. హరియాణా వర్సెస్ భజన్లాల్ కేసులో సుప్రీంకోర్టు మార్గదర్శకాలకు విరుద్ధంగా ఎఫ్ఆర్లను నమోదు చేశారని, తనపై కేసులు పెట్టడానికి తగిన ఆధారాలు లేవని రవిప్రకాశ్ వివరించారు. అంతేకాదు, పాత తేదీలతో వాటాలను విక్రయించినట్లు పత్రాలను సృష్టించినట్టు చేస్తున్న ఆరోపణల్లో నిజంలేదని తెలిపారు. అలాగే, తన 40 వేల వాటాలను రూ.20 లక్షలకు నటుడు శివాజీకి విక్రయించడంలో మోసానికి పాల్పడ్డానని చేస్తున్న ఆరోపణ వాస్తవం కాదన్నారు. ఇందులో నగదు బదిలీ జరిగిందని, అయితే ఎన్సీఎల్టీలో వాటాల బదలాయింపుపై స్టే ఉండటంతో అది జరగలేదన్నారు. దీనికి సంబంధించిన లావాదేవీల వివరాలను కోర్టుకు తెలియజేశారు. గతేడాది ఫిబ్రవరి 19న బ్యాంకు ఖాతాకు నగదు జమ చేశారని, 20న వాటాల బదిలీ ఒప్పందంపై సంతకం చేసినట్లు ఆయన వెల్లడించారు. కొంత మంది డేటాను తస్కరించడానికి ప్రయత్నిస్తున్నారన్న ఆరోపణలు పసలేనివని అన్నారు. అవాస్తవాలు, ఊహాజనిత ఆరోపణలతో తనపై దాఖలు చేసిన కేసులను కొట్టివేయాలని, అప్పటిదాకా విచారణ ప్రక్రియను నిలిపివేస్తూ స్టే జారీ చేయాలని కోరారు.
By June 28, 2019 at 08:51AM
No comments